തിരുവനന്തപുരം: മെഡിക്കൽ കോളേജുകളിലെ തിരക്ക് കുറയ്ക്കുന്നതിനും വിദഗ്ധ ചികിത്സ അടിയന്തരമായി ലഭ്യമാക്കുന്നതിനുമായി ആരോഗ്യവകുപ്പ് ആരംഭിച്ച 24×7 പ്രതീക്ഷാ സെന്റർ പദ്ധതി പുനലൂരിൽ വിജയകരം.
പരീക്ഷണാടിസ്ഥാനത്തിൽ പദ്ധതി നടപ്പാക്കിയ പുനലൂർ താലൂക്ക് ആശുപത്രിയിലെ പ്രവർത്തനം കണക്കുകളുടെ അടിസ്ഥാനത്തിൽ വിലയിരുത്തിയപ്പോൾ ശ്രദ്ധേയമായ മാറ്റമാണ് ഉണ്ടായതെന്ന് ആരോഗ്യ-ദേവസ്വം മന്ത്രി കെ. മുരളീധരൻ അറിയിച്ചു.
സ്പെഷ്യാലിറ്റി സേവനങ്ങൾ 24 മണിക്കൂറും ലഭ്യമാക്കിയതിലൂടെ ജനങ്ങൾക്ക് വലിയ നേട്ടമാണ് ഉണ്ടായത്. പദ്ധതി മാതൃകാപരമായി മുന്നോട്ടുപോകുന്നതിൽ പുനലൂർ എം.എൽ.എ. സി. അജയപ്രസാദ് സംതൃപ്തി രേഖപ്പെടുത്തിയതായും മന്ത്രി പറഞ്ഞു.
പുനലൂർ താലൂക്ക് ആശുപത്രിയിൽ നിന്നുള്ള റഫറൽ കേസുകൾ 30 ശതമാനം കുറയ്ക്കാൻ കഴിഞ്ഞതായി ആശുപത്രി സൂപ്രണ്ട് ഡോ. സുനിൽ മന്ത്രിയുടെ അധ്യക്ഷതയിൽ ചേർന്ന അവലോകന യോഗത്തിൽ അറിയിച്ചു.
ദേശീയ ആരോഗ്യ ദൗത്യത്തിന്റെ (NHM) സഹായത്തോടെ മൂന്ന് കാഷ്വാലിറ്റി മെഡിക്കൽ ഓഫീസർമാരെയും രണ്ട് വീതം ഗൈനക്കോളജിസ്റ്റ്, അനസ്‌തറ്റിസ്റ്റ് എന്നിവരെയും ഒരു പീഡിയാട്രീഷ്യനെയും അധികമായി നിയമിച്ചിട്ടുണ്ട്. മൂന്ന് സർജൻമാരെ കൂടി ഉടൻ നിയമിക്കും.
പദ്ധതി നടപ്പാക്കിയതോടെ പുനലൂർ താലൂക്ക് ആശുപത്രിയിലെ പ്രസവങ്ങളുടെ എണ്ണത്തിലും വർധനയുണ്ടായതായി സൂപ്രണ്ട് യോഗത്തിൽ വിശദീകരിച്ചു. പ്രതീക്ഷ സെന്റർ ജനോപകാരപ്രദമാണെന്ന് വിലയിരുത്തിയതിന്റെ പശ്ചാത്തലത്തിലാണ് പദ്ധതി നാല് ജില്ലകളിൽ കൂടി വ്യാപിപ്പിക്കാൻ തീരുമാനിച്ചതെന്ന് മന്ത്രി അറിയിച്ചു.
പാലക്കാട് ജില്ലാ ആശുപത്രി, മലപ്പുറം തിരൂർ ജില്ലാ ആശുപത്രി, കോഴിക്കോട് വടകര ജില്ലാ ആശുപത്രി, എറണാകുളം ജില്ലാ ആശുപത്രി എന്നിവിടങ്ങളിലാണ് ഒക്ടോബർ അവസാനത്തോടെ 24×7 പ്രതീക്ഷാ സെന്ററുകൾ ആരംഭിക്കുന്നത്.
ഈ വർഷം ഡിസംബർ വരെ പദ്ധതി വിവിധ ജില്ലകളിൽ പരീക്ഷണാടിസ്ഥാനത്തിൽ നടപ്പാക്കി പ്രവർത്തനഫലങ്ങൾ വിലയിരുത്തിയ ശേഷമായിരിക്കും സംസ്ഥാനതലത്തിൽ പൂർണതോതിൽ നടപ്പാക്കുക.
നിലവിൽ താൽക്കാലിക നിയമനങ്ങളിലൂടെ ആവശ്യമായ ജീവനക്കാരെ ആശുപത്രികളിൽ വിന്യസിക്കുന്നുണ്ട്. ഇതോടൊപ്പം സ്റ്റാഫ് പാറ്റേൺ പുനഃക്രമീകരിക്കൽ, പ്രൊവിഷണൽ പ്രമോഷൻ, ആവശ്യമായ അടിസ്ഥാന സൗകര്യങ്ങൾ ഒരുക്കൽ തുടങ്ങിയ നടപടികൾ സ്വീകരിക്കാൻ ആരോഗ്യവകുപ്പ് ഡയറക്ടറെ മന്ത്രി ചുമതലപ്പെടുത്തി.
ഡോക്ടർമാർ ഉൾപ്പെടെയുള്ള ആരോഗ്യപ്രവർത്തകർക്ക് അമിത ജോലിഭാരം ഉണ്ടാകാത്ത തരത്തിലായിരിക്കണം പദ്ധതി നടപ്പാക്കേണ്ടതെന്നും ആശുപത്രി സൂപ്രണ്ടുമാർ ഇക്കാര്യം ഉറപ്പാക്കണമെന്നും മന്ത്രി നിർദേശിച്ചു.
ഓരോ ജില്ലയിലും രണ്ട് ആശുപത്രികളെ വീതം പ്രതീക്ഷാ സെന്ററുകളാക്കി മെഡിസിൻ, ജനറൽ സർജറി, ഓർത്തോപീഡിക്സ്, പീഡിയാട്രിക്സ്, ഗൈനക്കോളജി തുടങ്ങിയ പ്രധാന സ്പെഷ്യാലിറ്റി സേവനങ്ങൾ 24 മണിക്കൂറും ലഭ്യമാക്കുകയാണ് പദ്ധതിയുടെ ലക്ഷ്യം. ഇതിലൂടെ ജനങ്ങൾക്ക് വീടിന് സമീപത്തുള്ള സർക്കാർ ആശുപത്രികളിൽ തന്നെ മുഴുവൻ സമയവും വിദഗ്ധ ചികിത്സ ലഭ്യമാക്കാനും മെഡിക്കൽ കോളേജുകളിലേക്കുള്ള അനാവശ്യ റഫറലുകൾ കുറയ്ക്കാനും സാധിക്കും.
തിരുവനന്തപുരം: സംസ്ഥാന സര്‍ക്കാരിന്‍റെ 100 ദിന കര്‍മ്മപരിപാടികളുടെ ഭാഗമായി ആവിഷ്കരിച്ച് നടപ്പാക്കുന്ന ‘ബ്രാന്‍ഡ് വയനാടി’ന്‍റെ ഔദ്യോഗിക പ്രഖ്യാപനം ഒക്ടോബര്‍ 6-7 തിയതികളില്‍ വൈത്തിരി വില്ലേജ് റിസോര്‍ട്ടില്‍ നടക്കും. രാജ്യത്തിനകത്തും പുറത്തും പ്രശസ്തമായ വിവിധ പ്രാദേശിക ടൂറിസം കേന്ദ്രങ്ങളെ തനത് ആഗോള ബ്രാന്‍ഡുകളായി ഉയര്‍ത്തുന്ന സംസ്ഥാന സര്‍ക്കാരിന്‍റെ പദ്ധതിയുടെ ഭാഗമായാണിത്. പ്രകൃതിദുരന്തങ്ങള്‍ക്ക് ശേഷമുള്ള വയനാടിന്‍റെ സാമ്പത്തിക പുനരുജ്ജീവനവും ജനങ്ങളുടെ ഉപജീവന സുരക്ഷയും ലക്ഷ്യമിട്ട് സംസ്ഥാന ബജറ്റില്‍ പ്രഖ്യാപിച്ചതാണ് ഈ കര്‍ട്ടന്‍ റൈസര്‍ പരിപാടി.
സംസ്ഥാന കൃഷി മന്ത്രി ടി. സിദ്ദിഖ് അധ്യക്ഷനാകുന്ന ചടങ്ങില്‍ ടൂറിസം, സാംസ്കാരിക, സിനിമ വകുപ്പ് മന്ത്രി പി.സി. വിഷ്ണുനാഥ് പദ്ധതിയുടെ ഔദ്യോഗിക പ്രഖ്യാപനം നടത്തും. എംഎല്‍എ മാരായ ഐ.സി ബാലകൃഷ്ണന്‍, ഉഷ വിജയന്‍, ജില്ലാ പഞ്ചായത്ത് പ്രസിഡന്‍റ് ചന്ദ്രിക കൃഷ്ണന്‍, കേരള ടൂറിസം ഡയറക്ടര്‍ എം. അഞ്ജന, അഡി. ഡയറക്ടര്‍ (ജനറല്‍) സുമിത് കുമാര്‍ താക്കൂര്‍, ജില്ലാ കലക്ടര്‍ ചെല്‍സ സിനി, സബ് കലക്ടര്‍ അതുല്‍ സാഗര്‍, കല്‍പറ്റ ബ്ലോക്ക് പഞ്ചായത്ത് പ്രസിഡന്‍റ് കെ.കെ ഹനീഫ, മുന്‍സിപ്പല്‍ ചെയര്‍മാന്‍ പി. വിശ്വനാഥന്‍, വൈത്തിരി പഞ്ചായത്ത് പ്രസിഡന്‍റ് സി.വി രാജന്‍, വിവിധ തദ്ദേശ സ്വയംഭരണ സ്ഥാപന അംഗങ്ങള്‍ തുടങ്ങിയവര്‍ ഉദ്ഘാടന ചടങ്ങില്‍ പങ്കെടുക്കും
‘ബ്രാന്‍ഡ് വയനാട്’ പരിപാടിയുടെ ഭാഗമായി വിദഗ്ധര്‍ നയിക്കുന്ന പ്രഭാഷണങ്ങളും ഉണ്ടാകും. ‘പ്രകൃതിയും വന്യജീവി വൈവിധ്യവും’ എന്ന വിഷയത്തില്‍ എം. എസ്. സ്വാമിനാഥന്‍ റിസര്‍ച്ച് ഫൗണ്ടേഷന്‍ ബയോഡൈവേഴ്സിറ്റി ലീഡ് സനീഷ് സി. എസും, ‘സംസ്കാരം’ എന്ന വിഷയത്തില്‍ പ്രശസ്ത സാഹിത്യകാരനും സാഹിത്യ അക്കാദമി പ്രസിഡന്‍റുമായ കല്‍പ്പറ്റ നാരായണനും, ‘കരകൗശലം’ എന്ന വിഷയത്തില്‍ ഉറവ് ഇന്‍ഡിജിനസ് സയന്‍സ് & ടെക്നോളജി സ്റ്റഡി സെന്‍റര്‍ സാമൂഹിക പ്രവര്‍ത്തകന്‍ ടി. ശിവരാജും സംസാരിക്കും.
വയനാടിനെ സുരക്ഷിതവും സുസ്ഥിരവുമായ ആഗോള വിനോദസഞ്ചാര കേന്ദ്രമായി മാറ്റുന്നതിനുള്ള ഉത്തരവാദിത്ത ടൂറിസം നയങ്ങളും ഹോംസ്റ്റേ നവീകരണവും പദ്ധതി ഉറപ്പാക്കും. വയനാടിനെ വിനോദസഞ്ചാര കേന്ദ്രം എന്നതിലുപരി പ്രകൃതിയും ജീവിതവും സംസ്കാരവും അനുഭവിക്കാവുന്ന ടൂറിസം ഉല്‍പ്പന്നമായി ആഗോള വിപണിയില്‍ അവതരിപ്പിക്കുകയാണ് ലക്ഷ്യം. വയനാട് കോഫി, സുഗന്ധവ്യഞ്ജനങ്ങള്‍, പരമ്പരാഗത നെല്ലിനങ്ങള്‍, തേന്‍ തുടങ്ങിയ ഉല്‍പ്പന്നങ്ങള്‍ക്കൊപ്പം പ്രാദേശിക പാചകരീതികള്‍, കാര്‍ഷിക ജീവിതം, ഗോത്രപൈതൃകം, ഗ്രാമീണ അനുഭവങ്ങള്‍ എന്നിവയും ടൂറിസവുമായി ബന്ധിപ്പിക്കും.
ഭൗമസൂചികാ പദവിയുള്ള ‘വയനാട് റോബസ്റ്റ കോഫി’യെ ‘ഫാം ടു കപ്പ്’ മാതൃകയില്‍ ആഗോള വിപണിയില്‍ പ്രീമിയം ബ്രാന്‍ഡായി അവതരിപ്പിക്കാനും ലക്ഷ്യമിടുന്നുണ്ട്. തനത് ഗോത്ര സംസ്കാര സംരക്ഷണത്തിനായി ‘എന്‍ ഊര്’ പൈതൃക ഗ്രാമം വിപുലീകരിക്കുന്നതിനൊപ്പം 50 കോടി രൂപ ചെലവില്‍ ട്രൈബല്‍ സര്‍വകലാശാലയും പൈതൃക വിജ്ഞാന മേഖലയും സ്ഥാപിക്കും. ഇതോടൊപ്പം കോര്‍പ്പറേറ്റ് പങ്കാളിത്തം ഉറപ്പാക്കുന്ന ‘വയനാട് സി.എസ്.ആര്‍ എക്സ്ചേഞ്ച്’ (ഭൂമി പോര്‍ട്ടല്‍), പരിസ്ഥിതി സംരക്ഷണത്തിനായുള്ള ‘ഇ-മാലിന്യ മുക്ത ഡ്രൈവ്’ എന്നിവയും ബ്രാന്‍ഡ് വയനാടിന്‍റെ ഭാഗമായി നടപ്പിലാക്കും.
‘എക്സ്പീരിയന്‍സ് വയനാട്’ എന്ന ആശയത്തിലൂടെ വയനാടിന്‍റെ വൈവിധ്യമാര്‍ന്ന അനുഭവങ്ങളെ ലോകസഞ്ചാരികള്‍ക്ക് പരിചയപ്പെടുത്തുന്നതിനൊപ്പം പ്രാദേശിക യുവാക്കള്‍ക്കും സ്ത്രീകള്‍ക്കും ആദിവാസി സമൂഹങ്ങള്‍ക്കും ടൂറിസം മേഖലയില്‍ കൂടുതല്‍ അവസരങ്ങള്‍ ഉറപ്പാക്കും. പരിശീലനം ലഭിച്ച പ്രാദേശിക ഗൈഡുകള്‍, ഹോംസ്റ്റേകള്‍, പ്രാദേശിക ഉല്‍പ്പന്നങ്ങളുടെ വിപണനം തുടങ്ങിയ മേഖലകളിലൂടെ ടൂറിസത്തിന്‍റെ നേട്ടങ്ങള്‍ കൂടുതല്‍ ജനങ്ങളിലെത്തിക്കാനും ലക്ഷ്യമിടുന്നു.
ദ്വിദിന സമ്മേളനത്തിന്‍റെ ആദ്യ ദിനമായ ഒക്ടോബര്‍ 6 ചൊവ്വാഴ്ച ബ്രാന്‍ഡ് വയനാട് വിഷന്‍ പ്രഖ്യാപനം, വിവിധ പദ്ധതികളുടെ ഉദ്ഘാടനം സാംസ്കാരിക പരിപാടികള്‍ തുടങ്ങിയവയാണ് സംഘടിപ്പിച്ചിട്ടുള്ളത്. തിരുനെല്ലി സര്‍ക്യൂട്ട്, ചേകാടി ഫാം സന്ദര്‍ശനം, കാപ്പി എക്സ്പീരിയന്‍സ് എന്നിവ ഉള്‍പ്പെടുന്ന ഗൈഡഡ് സഞ്ചാരവും ആദ്യ ദിനത്തില്‍ ഒരുക്കിയിട്ടുണ്ട്. വൈകീട്ട് ആറുമുതല്‍ എന്‍ ഊരില്‍ സാംസ്ക്കാരിക പരിപാടികള്‍ അരങ്ങേറും.
കര്‍ട്ടന്‍ റൈസര്‍ പരിപാടിയുടെ ഭാഗമായി രണ്ട് ദിവസങ്ങളിലും പൊതുജനങ്ങള്‍ക്കായി രാവിലെ 10:00 മുതല്‍ വൈകുന്നേരം 5:00 വരെ ‘എന്‍ ഊര്’ ലൈവ് എക്സ്പീരിയന്‍സ് സോണ്‍ പ്രവര്‍ത്തിക്കും. ഗോത്രവര്‍ഗ്ഗക്കാരുടെ തനത് ജീവിതരീതികള്‍, ഗോത്ര ഭക്ഷണമേള, പൈതൃക-കരകൗശല പ്രദര്‍ശനം, കമ്മ്യൂണിറ്റി അനുഭവങ്ങള്‍ എന്നിവ സന്ദര്‍ശകര്‍ക്ക് നേരിട്ടറിയാന്‍ അവസരം ഒരുങ്ങും
