തിരുവനന്തപുരം: മാസപ്പടിക്കേസിലെ ക്രൈംബ്രാഞ്ച് അന്വേഷണം യുഡിഎഫ്–എൽഡിഎഫ് ഒത്തുതീർപ്പിന്റെ ഭാഗമാണെന്ന് വി. മുരളീധരൻ എംഎൽഎ ആരോപിച്ചു. അഴിമതി നിരോധന നിയമപ്രകാരം അന്വേഷിക്കേണ്ട കേസിൽ വിജിലൻസിനെയാണ് അന്വേഷണം ഏൽപ്പിക്കേണ്ടത്. ആദായനികുതി വകുപ്പും എസ്എഫ്ഐഒയും ഇഡിയും അന്വേഷണം നടത്തി വസ്തുതകൾ കണ്ടെത്തിയ സാഹചര്യത്തിൽ ഇനി എന്ത് പ്രാഥമിക അന്വേഷണമാണ് വേണ്ടതെന്നും അദ്ദേഹം ചോദിച്ചു.
പിണറായി വിജയനെ സംരക്ഷിക്കാനുള്ള നീക്കമാണ് ഇപ്പോഴത്തെ അന്വേഷണത്തിന് പിന്നിലെന്നും അദ്ദേഹം ആരോപിച്ചു. ആത്മാർഥതയുണ്ടെങ്കിൽ അന്വേഷണം സിബിഐക്ക് വിടാൻ യുഡിഎഫ് സർക്കാർ തയ്യാറാകണമെന്നും മുരളീധരൻ ആവശ്യപ്പെട്ടു.
ശബരിമല തീർഥാടനത്തിന് ആവശ്യമായ മുന്നൊരുക്കങ്ങൾ സർക്കാർ അടിയന്തരമായി പൂർത്തിയാക്കണം.
അയ്യപ്പഭക്തർക്ക് സുഗമമായ ദർശനത്തിനും ആവശ്യമായ സൗകര്യങ്ങൾ ഒരുക്കുന്നതിനും സർക്കാർ അടിയന്തര നടപടി സ്വീകരിക്കണം. തീർഥാടനകാലത്തിന് മുമ്പ് അരവണ പ്ലാന്റ് പ്രവർത്തനക്ഷമമാക്കണമെന്ന കാര്യം സർക്കാരിന് അറിയാവുന്നതാണ്. സീസൺ ആരംഭിക്കുന്നതിന് മുമ്പ് 70 ലക്ഷം യൂണിറ്റ് കരുതൽ ശേഖരം ഉണ്ടാക്കണമെന്ന തീരുമാനമുണ്ടായിട്ടും അതിനുള്ള നടപടികൾ എവിടെയെത്തിയെന്ന് മുഖ്യമന്ത്രി വ്യക്തമാക്കണമെന്നും മുരളീധരൻ ആവശ്യപ്പെട്ടു.
ദേവസ്വം ബോർഡിനെ മാത്രം കുറ്റപ്പെടുത്തി സർക്കാരും ദേവസ്വം മന്ത്രിയും ഉത്തരവാദിത്വത്തിൽ നിന്ന് ഒഴിഞ്ഞുമാറുകയാണ്. ദേവസ്വം വകുപ്പിന് ബോർഡിനുമേൽ യാതൊരു നിയന്ത്രണവുമില്ലെങ്കിൽ പിന്നെ എന്തിനാണ് ഈ വകുപ്പ്? എല്ലാ സംവിധാനങ്ങൾക്കും മുകളിൽ ഒരു അഡ്മിനിസ്ട്രേറ്റീവ് വകുപ്പ് എന്ന നിലയിൽ ദേവസ്വം വകുപ്പിന്റെ ഉത്തരവാദിത്വം എന്താണെന്നും അത് നിർവഹിക്കപ്പെടുന്നുണ്ടോ എന്നും പരിശോധിക്കണം.ചുരുക്കത്തിൽ, ശബരിമലയ്ക്കായി ആവശ്യമായ മുന്നൊരുക്കങ്ങൾ നടത്തുന്നതിൽ സർക്കാർ പരാജയപ്പെട്ടുവെന്നാണ് ഇപ്പോഴത്തെ സാഹചര്യം വ്യക്തമാക്കുന്നത്. ഓണസദ്യ മുടങ്ങിയപ്പോഴും പരസ്പരം കുറ്റപ്പെടുത്തി ഉത്തരവാദിത്വത്തിൽ നിന്ന് ഒഴിഞ്ഞുമാറുന്ന സമീപനമാണ് സർക്കാർ സ്വീകരിച്ചത്.
ശബരിമലയെ തകർക്കാൻ കഴിഞ്ഞ സർക്കാരിന്റെ കാലത്ത് നടന്ന നീക്കങ്ങൾ മറ്റൊരു രീതിയിൽ മുന്നോട്ടുകൊണ്ടുപോകാനുള്ള ശ്രമമാണ് ഇപ്പോഴത്തെ സർക്കാരും നടത്തുന്നതെന്നും മുരളീധരൻ ആരോപിച്ചു.മുഖ്യമന്ത്രിയുടെ യാത്രയ്ക്കായി ചാർട്ടേഡ് വിമാനം ഏർപ്പെടുത്തിയ വ്യക്തി ആരാണ്? എന്താണ് അതിന് പിന്നിലെ താൽപര്യം? മലപ്പുറത്ത് നിരവധി മന്ത്രിമാരുണ്ടായിരിക്കെ മുഖ്യമന്ത്രി തന്നെ നേരിട്ട് അവിടേക്ക് പോകേണ്ട സാഹചര്യമെന്താണെന്നും അദ്ദേഹം ചോദിച്ചു. തലസ്ഥാനത്തിരുന്ന് കാര്യങ്ങൾ ഏകോപിപ്പിക്കാൻ കഴിയാത്ത സാഹചര്യമാണോ ഉള്ളതെന്നും മുരളീധരൻ ചോദിച്ചു.
കർണാടകത്തിലെ ഒരു മന്ത്രിയുടെ ചാർട്ടേഡ് വിമാനത്തിലാണ് മുഖ്യമന്ത്രി യാത്ര ചെയ്തതെന്നാണ് പറയുന്നത്. കേരളത്തിന്റെ മുഖ്യമന്ത്രിക്ക് ഇത്തരത്തിൽ വിമാനം ഏർപ്പെടുത്താൻ ആ മന്ത്രിക്ക് എന്താണ് താൽപര്യമെന്നും അതിന് പകരമായി കേരള സർക്കാർ എന്തെങ്കിലും ചെയ്യേണ്ടതുണ്ടോയെന്ന സംശയം ജനങ്ങൾക്കുണ്ടെന്നും മുരളീധരൻ പറഞ്ഞു.
കോൺഗ്രസുകാരനായതിനാലാണ് സൗജന്യമായി വിമാനം നൽകിയതെന്ന വാദമാണ് കോൺഗ്രസ് നേതാക്കൾ ഉന്നയിക്കുന്നത്. അങ്ങനെയാണെങ്കിൽ ഇന്ത്യയിലെ ഏതൊക്കെ കോൺഗ്രസ് നേതാക്കൾക്ക് ഈ മന്ത്രി സൗജന്യമായി വിമാനം നൽകിയിട്ടുണ്ടെന്നതിന്റെ പട്ടിക പുറത്തുവിടണം. മുടന്തൻ ന്യായങ്ങൾ പറയുന്നതിന് പകരം മുഖ്യമന്ത്രി ഇക്കാര്യത്തിൽ വ്യക്തമായ വിശദീകരണം നൽകണമെന്നും ബിജെപി ആവശ്യപ്പെടുന്നതായി വി. മുരളീധരൻ പറഞ്ഞു.
സർക്കാർ ആശുപത്രികളിലെ സ്റ്റാഫ് പാറ്റേൺ പരിഷ്കരിക്കും: മന്ത്രി കെ.മുരളീധരൻ
#തിരുവനന്തപുരം മെഡിക്കൽ കോളേജിൽ പുതിയ ക്രിട്ടിക്കൽ കെയർ ബ്ലോക്കിന് തറക്കല്ലിട്ടു#
സർക്കാർ ആശുപത്രികളിലെ അമിത ജോലിഭാരം കുറയ്ക്കുന്നതിനായി 1960-കളിലെ പഴയ സ്റ്റാഫ് പാറ്റേൺ പരിഷ്കരിക്കാൻ സർക്കാർ തീരുമാനിച്ചതായി ആരോഗ്യ വകുപ്പ് മന്ത്രി കെ. മുരളീധരൻ. ധനകാര്യ വകുപ്പിന്റെ സഹകരണത്തോടെ ഡോക്ടർമാരുടെയും ജീവനക്കാരുടെയും പുതിയ തസ്തികകൾ സൃഷ്ടിക്കുമെന്നും പ്രൈമറി ഹെൽത്ത് സെന്ററുകൾ ഉൾപ്പെടെയുള്ള ആശുപത്രികളിൽ പുതിയ നിയമനങ്ങൾ നടത്തുമെന്നും അദ്ദേഹം വ്യക്തമാക്കി. തിരുവനന്തപുരം മെഡിക്കൽ കോളേജിൽ പുതിയ ക്രിട്ടിക്കൽ കെയർ ബ്ലോക്കിന്റെ തറക്കല്ലിടൽ നിർവഹിച്ചു സംസാരിക്കുകയായിരുന്നു മന്ത്രി.
നിലവിലുള്ള ഒഴിവുകൾ അടിയന്തരമായി നികത്തുന്നതിനൊപ്പമാണ് പുതിയ തസ്തികകളും സൃഷ്ടിക്കുന്നത്. ജില്ലാ, ജനറൽ ആശുപത്രികളിൽ 24 മണിക്കൂർ സ്പെഷ്യാലിറ്റി സേവനം ഏർപ്പെടുത്തിയപ്പോൾ ഡോക്ടർമാരുടെ സംഘടനകൾ ആശങ്കകൾ പ്രകടിപ്പിച്ചിരുന്നതായും അവരുമായി സംസാരിച്ച് പരിഹാരങ്ങൾ തുടങ്ങിയതായും മന്ത്രി അറിയിച്ചു.
സർക്കാർ ആശുപത്രികളിൽ മരുന്നുകൾ പൂർണമായും ലഭ്യമാക്കാനുള്ള നടപടികൾ പുരോഗമിക്കുകയാണെന്നും ആശുപത്രികളുടെ സേവനങ്ങളെ തരംതാഴ്ത്തിക്കാട്ടാനുള്ള ശ്രമങ്ങളെ പ്രതിരോധിക്കണമെന്നും മന്ത്രി വ്യക്തമാക്കി. എക്കാലത്തും സാധാരണക്കാരുടെ പ്രധാന ആശ്രയം സർക്കാർ ആശുപത്രികളാണെന്നും മികച്ച സൗകര്യങ്ങൾ ഉറപ്പാക്കുകയാണ് സർക്കാരിന്റെ ലക്ഷ്യമെന്നും അദ്ദേഹം പറഞ്ഞു.
ആശുപത്രികളിൽ മരുന്ന് ലഭ്യത ഉറപ്പാക്കാൻ അടിയന്തര നടപടികളാണ് സ്വീകരിക്കുന്നത്. അത്യാവശ്യമായ 855 മരുന്നുകളിൽ 664 എണ്ണത്തിനും പർച്ചേസ് ഓർഡർ നൽകിക്കഴിഞ്ഞു. ഇതിൽ 530ലധികം മരുന്നുകൾ നിലവിൽ ലഭ്യമാണ്. ബാക്കിയുള്ളവയ്ക്കായി വീണ്ടും ടെൻഡർ ക്ഷണിച്ചിട്ടുണ്ട്. ആസ്പിരിൻ, ഡോക്സിസൈക്ലിൻ എന്നിവ ഈ മാസം അവസാനത്തോടെയും, ബാക്കി മുഴുവൻ മരുന്നുകളും ഒക്ടോബർ ആദ്യവാരത്തോടെയും പൂർണതോതിൽ ആശുപത്രികളിൽ ലഭ്യമാക്കുമെന്നും മന്ത്രി അറിയിച്ചു.
എച്ച്.എൽ.എൽ ലൈഫ് കെയർ ലിമിറ്റഡ് വഴി നിർമിക്കുന്ന പുതിയ ക്രിട്ടിക്കൽ കെയർ ബ്ലോക്കിന്റെ പ്രവൃത്തികൾ 18 മാസത്തിനകം പൂർത്തിയാക്കാൻ നിർദേശം നൽകിയിട്ടുണ്ടെന്നും അദ്ദേഹം പറഞ്ഞു.
ഗുരുതരാവസ്ഥയിലുള്ള രോഗികൾക്ക് അടിയന്തര വിദഗ്ദ്ധ ചികിത്സ ഉറപ്പാക്കുന്നതിനായി 36,000 ചതുരശ്രയടി വിസ്തീർണത്തിൽ മൂന്ന് നിലകളായാണ് പുതിയ ബ്ലോക്ക് നിർമിക്കുന്നത്. ഭാവിയിൽ രണ്ട് നിലകൾ കൂടി നിർമിക്കാവുന്ന രീതിയിലാണ് ഇതിന്റെ രൂപകല്പന.
കാഷ്വാൽറ്റി, മെറ്റേണിറ്റി വാർഡ്, ലേബർ-ഡെലിവറി റിക്കവറി യൂണിറ്റുകൾ, എക്സ്റേ, അൾട്രാ സൗണ്ട് സ്കാനിംഗ്, മൈനർ ഓപ്പറേഷൻ തിയേറ്റർ എന്നിവയാണ് ഗ്രൗണ്ട് ഫ്ളോറിൽ ഉൾപ്പെടുന്നത്. ഒന്നാം നിലയിൽ ഡയാലിസിസ് യൂണിറ്റ്, ഐസൊലേഷൻ മുറികൾ, വിവിധ വാർഡുകളും രണ്ടാം നിലയിൽ ഇന്റൻസീവ് കെയർ യൂണിറ്റ്, ഹൈ ഡിപ്പൻഡൻസി യൂണിറ്റ്, ഓപറേഷൻ തിയേറ്റർ കോപ്ലക്സ് എന്നിവ ഉൾപ്പെടെ ഗുരുതര പരിചരണത്തിനും ശസ്ത്രക്രിയ സേവനങ്ങൾക്കുമുള്ള സൗകര്യങ്ങളുമാണ് ഒരുക്കുന്നത്.
നിർമാണ പ്രവർത്തനങ്ങൾക്കും മറ്റ് അനുബന്ധ സേവനങ്ങൾക്കുമായി എച്ച്.എൽ.എല്ലിന് 20.97 കോടി രൂപയും മെഡിക്കൽ ഗ്യാസ് പൈപ്പ് ലൈൻ സിസ്റ്റം, മോഡുലാർ ഓപറേഷൻ തിയേറ്റർ ഫർണിഷിങ്,ആവശ്യമായ മെഡിക്കൽ ഉപകരണങ്ങൾ സ്ഥാപിക്കൽ എന്നിവയ്ക്കായി കേരള മെഡിക്കൽ സർവീസസ് കോർപ്പറേഷൻ ലിമിറ്റഡിന് 2.78 കോടി രൂപയുടെയും ഭരണാനുമതി നൽകിയിട്ടുണ്ട്.
മെഡിക്കൽ കോളേജ് പഴയ ഓഡിറ്റോറിയത്തിൽ നടന്ന ചടങ്ങിൽ ആരോഗ്യ വകുപ്പ് പ്രിൻസിപ്പൽ സെക്രട്ടറി ഡോ. ഷർമിള മേരി ജോസഫ്, ആരോഗ്യ വിദ്യാഭ്യാസ ഡയറക്ടർ ഡോ.കെ.വി വിശ്വനാഥൻ, ആരോഗ്യ കേരളം മിഷൻ ഡയറക്ടർ ഡോ. രേണുരാജ്, ഡി.പി.എം ഡോ. അർനോൾഡ് ദീപക്, മെഡിക്കൽ കോളേജ് സൂപ്രണ്ട് ഡോ. സി.ജി ജയചന്ദ്രൻ, പ്രിൻസിപ്പാൾ ഡോ. രഞ്ജു രവീന്ദ്രൻ തുടങ്ങിയവരും പങ്കെടുത്തു.
